يوميـــــــاتي لما بقيت مشرفة في المنتدى..
اول ما قمت من النوم لقيت الموبايل بتاعي بيرن
فلقيت مدير المنتدى بيتصل بيا..
إلهام أخاتار:اصطبحنا واصبح الملك لله ..... صباح الخير يا مانشي..
مانشي: خير هييجى منين الخير يا ستي..
انت سايبة قسمك ونايمة.. الله يخرب بيت اللى شار عليا الشورة السودة دي انى امسكك مشرفة.. انت متنفعيش حتى تبقي عضو موقوف..
إلهام أخاتار: ليه بس يا فندم دا انا حتى مغسلتش وشي ودخلت على طول على المنتدى..ده إبراهيم زوجي زعق لي امبارح وقال لي كفاية يا إلهام..و ده أخر إنذار..
مانشي : عموما ادخلي شوفي قسمك وده اخر إنذار ليك..
إبراهيم ومانشي....كلهم إدوني أخر إنذااااار
وانتهت المكالم وأنا طبعا متضايقة و قلت.. أنا إيه بس ياربي اللي دبسني التدبيسة السودة دي..؟ ماكنت عضو..أدخل وقت ما أنا عايزة.. ومية مية..
المهم دخلت على الرسائل الخاصة بتاعتي بقى لقيت الرسائل دي..
الرسالة الأولى
السلام عليكم ...ازيك يا مشرفتنا .. بقولك أنا اضفت موضوع بس معرفش شكله نزل ثلاث مرات بالغلط أحذفي أي واحد فيهم .. اللي يعجبك أنت بس احذفي..
الرسالة الثانية
مرحبا مشرفتنا ..... بقلك شوفي : في عضو قاعدلي كل موضوع يرد عليا ويهيني قدام الأعضاء ... لو ماسكتهوش حأعمل حاجة محصلتش.. واقلبلكم المنتدى .. وقد أعذر من أنذر ...
الرسالة الثالثة
إلحقيني يا إلهام... كل ما أدخل المنتدى يطلعني بره ... ومش راضي يدخلني ايه الحكاية شكلها كده الدخول.. بفلوس ..
الرسالة الرابعة
مشرفتنا ... ممكن لو سمحت تعدل اسمي من الحلوة الى ملكة جمال المنتديات..
الرسالة الخامسة
هاي إلهام... يارب تكوني مبسوطة .. بصراحة شخصيتك عاجباني..و ياريت يعني اذا عملت موضوع ثبتيهولي ..على فكرة انا زعلان محدش يثبتلي مواضيعي..
وهو أنا لقيت اللي يثبت لي مواضيعي؟؟
الرسالة السادسة
ياإلهام أقول لك على حاجة : مش حسلم عليك ولا حاجة انت أصلاُ ماتستاهليش.. كل ما أعمل موضوع تحذفهولي .. عجيبة والله ...
الرسالة السابعة
مساك زي الفل يا حلوة..
بصراحة انا مكسوف منك عايز أطلب طلب بسيط ... يعني انا عايز اعرف ازاي المشرفين بيتعاملو مع المواضيع و إيه الطريقة..؟ يعني بالعربي الفصيح .. عايز الباسوورد بتاعتك اذا تكرمت..
الرسالة الثامنة
يا أنسة.. انت زودتيها ... شايفة نفسك علينا.. وكل مانكلمك ما تديناش وش .. يا ستي الاشراف مش يعني بقيت ملكة ولا برنسيسة ... اختشي على دمك بقى .. قال مشرفة قاال ... انت أصلاً خدامة علينا في المنتدى.. يعني تخدمينا.. ولا اقولك : روحي هاتيلي واحد شاااي
الرسالة التاسعة
حبيبة قلبى... ازيك يا روحي...أنا معجب بيك كثير من أول ما شفت صورتك الرمزية..أنا أخذت إيمايلك من ملفك الشخصي..كلميني على الهوتمايل.. ضروري..بااااي..
الرسالة العاشرة
(من المدير العام مانشي)
السلام عليكم ..أختي ...ألاحظ كثرة الشكاوي من الأعضاء وكثرة المشاكل أرجوا تهدئة الأمور بأسرع وقت .. وان تفعلي أي شي لمصلحة المنتدى.. حاولي التوفيق بين المنتدى وبين حياتك الزوجية..ولا أقولك.. ما تسيبي نفسك من الواد إبراهيم وركزي معانا في المنتدى.. وشكرا...
الرسالة الحادية عشر
لو سمحتي يا مشرفتنا العزيزة.. فى بنت موجودة على المنتدى ياريت تبقي تبعتيلي إيمايلها على ايميلي.. وليك الحلاوة طبعا..
مع احترامي للمدير العام وجميع المشرفين والأعضاء..
موضوع: يوميـــــــاتي لما بقيت مشرفة في المنتدى.. 
